Manifiestu

Declaración d’Independencia del Vínculu Dixital. Esti manifiestu rixe tolos proyeutos de Xiringase.

Arquiteutos del Capitalismu de Vixilancia, Xigantes de la Estraición Algorítmica, Mercaderes de la Atención Humana:

Venimos d’un territoriu que nunca vos perteneció: la Confianza. Tresformastis la conversa en telemetría y a cada persona nun perfil. Nós refugamos esi modelu.

I. El Vínculu ye Soberanu

Quien se rellaciona con nós ye un sociu, non un oxetivu nin una métrica. Nun usamos la retención adictiva nin los perfiles psicolóxicos.

II. Cuntar ye Ciencia; Identificar ye Política

La nuesa analítica nun usa cookies nin identifica a naide: los nuesos sistemes de midida tienen memoria pal valor y amnesia pa la identidá. Cuando un serviciu necesita saber quién yes —un pidíu, una soscripción—, guarda lo imprescindible, namás pa eso.

III. La Inviolabilidá del Pensamientu

La intelixencia artificial tien que ampliar la voluntá humana, non suplantala: nenguna pieza se publica nin s’unvia en masa ensin l’aprobación previa d’una persona. Apostamos pola intelixencia artificial local cuando seya aplicable.

IV. Arquiteutura sobre Promesa

Nun vos pidimos que confiéis nes nueses pallabres: comprobái lo que sirvimos. La privacidá ye l’estáu por defeutu, non una opción escondida nun menú. Diseñamos pa que l’abusu seya difícil y, si asocede, visible.

V. Marketing Contextual, non Acosu Conductual

Nun rastrexamos buelga dixital nin cruciamos datos ente sitios. Tamos onde’l mundu real nos busca, pero nunca pagamos pa qu’un algoritmu nos amplifique nin construyimos ferramientes que reforcen el so sistema de captura. Queremos merecer la confianza, non prindar l’atención.

VI. Tresparencia Radical

Ensin llaberintos de consentimientu nin patrones escuros. Cada sociu tien drechu a entender lo que facemos cola so información.

VII. Claridá de l’Ufierta

Nun ufiertamos nada que nun entreguemos, y lo esencial ta a la vista enantes de decidir. «Sociu» designa la rellación, non el papel llegal: onde la llei esixe otru términu, usámoslu ensin que cambie’l tratu y nunca con menos garantíes.

Nun somos una audiencia. Nun somos una tasa de conversión. Somos persones llibres que cooperen. Naide nos dio esta llibertá. Támosla programando.