Cómo te vixilen (II): qué fain Google y Meta colos tos datos

Imaxina que guetes unes zapatielles. Entres nuna tienda en llinia, mires tres pares y zarres la llingüeta. Esa tarde, n’otra web y na to rede social, apaecen anuncios d’eses mesmes zapatielles. Delles vegaes esto pasa porque la tienda activó ferramientes de Google o de Meta que mandan lo que fixisti a los sos sistemes d’anuncios.

Na pieza anterior víemos qué recueyen Google Analytics y el Píxel de Meta, dos ferramientes qu’usen munchísimes webs. Hoi: ¿qué fain Google y Meta con esos datos?

Un avisu de métodu: cuando’l testu diz «al nuesu xuiciu», ye una interpretación propia, non una afirmación de Google, de Meta o d’un testu legal — marcámoslo así cada vegada pa que distingas un fechu documentáu d’una llectura nuesa.

La rempuesta curtia: Google y Meta puen usar lo que fais nuna web pa decidir qué anuncios t’amuesen dempués, n’otros sitios y apps — delles vegaes namás si esa web lo activa. Hai formes de llimitalo: al final cuntámosles.

Lo que dicen que fain

Google diz que’l so papel básicu ye trabayar pa la web: midir les visites per encargu de la tienda y según los ayustes del so dueñu. Pero si’l dueñu activa un ayuste d’intercambiu de datos, Google «puede acceder y analizar los datos para comprender mejor el comportamiento y las tendencias en línea, y usarlos para mejorar los productos y servicios de Google», por exemplu les ferramientes de Google Ads, y, según la so ayuda, Google actúa entós como responsable del tratamientu independiente d’esos datos (ayuda de Analytics). La so política de privacidá amiesta que, cuando visites sitios o apps qu’usen los sos servicios d’anuncios o analítica, «esos servicios pueden vincular la información de tu actividad en ese sitio o app con la de otros sitios y apps que usan nuestros servicios».

Meta diz, nos términos qu’aceuten les webs, que pue usar esos datos pa midir, pa crear les audiencies que la web-y pida y pa personalizar los anuncios qu’amuesa «dientro y fuera de nuestros productos». Pue combinalos con otros datos y guardalos hasta dos años. Y la so política de privacidá diz que recibe esta información «tengas o no la sesión iniciada o una cuenta».

Meta afirma que nun vende la to información a naide. Google nun diz que la venda y afirma que nun comparte con anunciantes información que t’identifique, como’l to nome o’l to corréu, salvo que lo pidas tu.

A ónde van: a los sos anuncios

Volvamos a les zapatielles. Según les ayudes de les propies empreses, esto pue pasar, siempre que la tienda lo active:

• Con Google, si la tienda vincula Analytics cola so cuenta de Google Ads y activa la personalización, el grupu de «persones que vieron un productu y nun lu compraron» pasa a Google Ads y sirve pa amosar-yos anuncios na gueta, en webs y apps con anuncios de Google y en YouTube (ayuda y exemplu de remarketing).
• Con Meta, la tienda pue crear grupos de persones colos eventos del Píxel y, si’l grupu tien polo menos 100, pidi-y a Meta que gueta otres «persones asemeyaes» (documentación). Al nuesu xuiciu, la to visita pue acabar siendo parte del puntu d’entamu col que Meta decide a quién amosar anuncios dempués.

Ye’l negociu de les dos. Según los sos informes anuales a la SEC (el regulador bursátil d’EE. UU.), la publicidá aportó más del 70 % de los ingresos d’Alphabet en 2025 y, coles cifres del so informe, un 97,6 % de los de Meta. Nenguno de los dos informes les atribúi a Analytics nin al Píxel: al nuesu xuiciu, esplica l’interés, nun lo prueba.

¿Qué diz la llei?

En resume, enantes d’entrar en detalle:

• Na UE y España, la web necesita’l to permisu enantes de guardar o lleer información nel to preséu.
• Como «guardianes d’accesu», Google y Meta tienen regles propies —aparte de les que-yos aplica a cualquier web—, anque’l testu nun diz que Analytics o’l Píxel tean ente los servicios suxetos a elles.
• N’EE. UU. nun hai llei federal, pero dellos estaos —California ente ellos— sí tienen la so.

La web necesita’l to permisu

Na UE y n’España, a fecha d’ochobre de 2026, la web necesita’l to permisu enantes de guardar o lleer información nel to preséu, salvo que seya imprescindible pa date’l serviciu que pides. Esíxenlo la directiva europea de privacidá electrónica y la llei española (la LSSI).

La AEPD, l’axencia española de proteición de datos, diz na so guía de 2024 (que inclúi los llamaos web beacons: imáxenes invisibles que se descarguen al visitar una web y permiten rexistrar la visita) que la analítica tampoco nun ta exenta.

Recueye amás la opinión del Grupu del Artículu 29 (l’antecesor del actual comité europeu de proteición de datos): ye pocu probable que la analítica propia d’una web supón un riesgu si namás usa cookies de primer parte y datos agregaos con una finalidá estrictamente estadística, informa del so usu y permite negase.

Tamién diz que refugar tien que tar tan a la vista como aceutar.

Al nuesu xuiciu, la llei nun prohíbe usales; lo qu’esixe, en xeneral, ye pidir permisu enantes de guardar o lleer información nel to preséu.

La web tamién responde

En 2019, a propósitu del botón «Me gusta» de Facebook, el Tribunal de Xusticia de la UE decidió (cola directiva anterior al RGPD) que la web que lu instala pue ser corresponsable de recoyer y unviar esos datos, y tien que pidite’l permisu; non de lo que Facebook faiga dempués.

Al nuesu xuiciu, el razonamientu asemeya al del Píxel.

Google y Meta tienen regles propies

Como «guardianes d’accesu», el reglamentu europeu de mercaos dixitales prohíbe-yos, nos servicios básicos de plataforma que la Comisión designó, tratar datos personales de quien usa servicios de terceros sofitaos en ellos col fin de prestar publicidá en llinia, y combinalos colos de los sos otros servicios, salvo que-y ufierten una opción específica y consigan el so consentimientu. Esti testu nun afirma que Google Analytics o’l Píxel de Meta tean ente esos servicios.

En abril de 2025 la Comisión multó a Meta con 200 millones d’euros porque, según la Comisión, el so modelu de «consentir o pagar» nun ufiertaba una opción real con menos datos personales nin un consentimientu llibre pa combinar los datos. Meta recurrió la decisión.

N’Estaos Xuníos

N’EE. UU., que sepamos, a 20 d’ochobre de 2026 nun hai una llei federal xeneral de privacidá (hai proyeutos nel Congresu); dellos estaos tienen la so.

En California, si una web unvía los tos datos a un terceru pa publicidá basada en lo que fais n’otres webs, la llei llámalo «compartir», aunque naide pague, y les empreses que superen dellos umbrales tienen qu’ufiertate un enllaz o una señal del navegador pa dicir que non. Tócate a ti dicir que non. La esceición son los menores de 16 años cuando l’empresa sabe la so edá (o la inora deliberadamente): ehí fai falta autorización previa (del propiu menor ente 13 y 15 años, de los sos pas per debaxo de 13).

Lo que pues facer

• Nel avisu de cookies, refuga lo que nun necesites.
• Si tienes cuenta de Meta, usa «Actividá fuera de Meta» (nun disponible en toles rexones). Dexa-te «desconectar» esa actividá de la to cuenta, anque la so ayuda nun diz que se desaniciare lo que ya recibió.
• Nos Axustes d’anuncios de Google pues ver y apagar la personalización d’anuncios asociada a la to cuenta.
• Pidi que dexen d’usar los tos datos pa mercadotecnia direuta: na UE pues oponete en cualquier momentu, según l’artículu 21 del RGPD (al nuesu xuiciu, la publicidá personalizada d’una plataforma encaxa ehí). Si nun t’atienden, reclama énte la AEPD, si vives n’España, o énte l’autoridá del to país.
• Si tas n’EE. UU., activa nel to navegador la señal Global Privacy Control y usa, cuando esista, l’enllaz «Nun vender nin compartir la mio información personal».

Lo que te lleves

Según los sos documentos, Google y Meta puen usar lo que fais nuna web pa los sos anuncios (Google, en dellos casos namás si la web lo activa) y, según la directiva europea de privacidá electrónica, la web necesita en xeneral el to permisu previu pa guardar o lleer información nel to preséu. Asina que, si tres mirar unes zapatielles te siguen los sos anuncios, agora sabes per qué camín pue tar vinío. Na próxima pieza cuntamos lo que facemos nós en so llugar.

Una aclaración que nos incumbe: Xiringase usa Meta Business Suite, la ferramienta de Meta pa programar publicaciones en redes sociales. Nun ye lo mesmo que montar sobro los nuesos visitantes les ferramientes que describimos, pero tamos dientro d’esi ecosistema, y prefierimos dicilo. A 20 d’ochobre de 2026, nel códigu inicial de les portaes de les siete webs con analítica de Xiringase (xiringase.com, tever.es, labs.tever.es, emtifervienza.com, lavieya.com, tienda.lavieya.com y asturianu.org) nun apaecen nin Google Analytics nin el Píxel de Meta (nun revisamos el restu de páxines).

Fontes (17)

Consultaes el 2026-10-14; les que sostienen cites llitereles, volvíes a cotexar el 2026-10-20.

Google:

• Google. «Safeguarding your data». Ayuda d’Analytics (ayustes d’intercambiu de datos, Google signals, funciones de publicidá, vinculación con Google Ads, audiencies y el so usu n’otros productos, conversiones).
• Google. «Política de privacidad» (vixente dende’l 16 d’ochobre de 2026).
• Alphabet. «Annual report (Form 10-K) 2025».

Meta:

• Meta. «Business Tools Terms» (vixentes dende’l 2025-11-03).
• Meta. «Política de privacidad» (vixente dende’l 2026-07-23).
• Meta. «Actividad fuera de Meta».
• Meta for Developers. «Custom Audiences, Lookalike Audiences y API de Conversiones».
• Meta. «Annual report (Form 10-K) 2025».

Llei (UE y España):

• «Directiva 2002/58/CE, art. 5(3)».
• «LSSI, art. 22.2».
• AEPD. «Guía de cookies» (mayu de 2024).
• «RGPD, arts. 15, 17, 21 y 77».
• «DMA, art. 5(2)».
• Comisión Europea. «Nota IP/25/1085» (2025-04-23).
• TJUE. «C-40/17 Fashion ID» (2019).

Llei (EE. UU.):

• «Código Civil de California § 1798.140, § 1798.120 y § 1798.135».
• Fiscalía de California. «Preguntas frecuentes sobre GPC».